‘ఆషిఖీ-3’లో అన్నీ నేనే పాడుతా!

 మహేశ్‌భట్‌ వారసురాలిగా బాలీవుడ్‌లోకి అడుగుపెట్టింది ఆలియాభట్‌. విభిన్న పాత్రల్లో నటిస్తూ మెప్పిస్తోంది. రొమాంటిక్‌ చిత్రం ‘ఆషిఖీ 3’లో ఈ భామ నటించేందుకు సిద్ధమవుతోంది. ఈ నేపథ్యంలో ఆలియా పలు ఆసక్తికరమైన విషయాలు వెల్లడించింది.
ఎలాంటి అంచనాలు లేకుండా 2013లో వచ్చిన ‘ఆషిఖీ 2’ రొమాంటిక్‌ మ్యూజికల్‌ హిట్‌గా నిలిచింది. అందులోని ప్రతి పాట ప్రేక్షకులను బాగా ఆకట్టుకుంది. ఇప్పుడు అదేస్థాయిలో ‘ఆషిఖీ 3’ నిర్మించేందుకు సన్నాహాలు చేస్తున్నారు. మోహిత్‌ సూరి దర్శకత్వం వహించనున్నారు. ఈ సినిమాలో అన్ని పాటలు తానే పాడనున్నట్లు ఆలియాభట్‌ తెలిపింది.
ప్రస్తుతం ఈ చిత్రానికి సంబంధించిన స్క్రిప్టు పనులు జరుగుతున్నాయని చెప్పిన ఈ అమ్మడు... సెట్స్‌పైకి ఎప్పుడు వెళ్లనుందో మాత్రం తెలియదంటోంది.

స్టెప్పులు అదిరిపోతాయ్‌

 ఎన్టీఆర్‌ డ్యాన్సుల గురించి ప్రత్యేకంగా చెప్పక్కర్లేదు. క్లాసికల్‌ డ్యాన్స్‌ నేర్చుకొని మరీ బరిలో దిగాడేమో, ఎలాంటి భంగిమనైనా చిటికెలో చేసేస్తాడు. మెరుపు కంటే వేగంగా కాలు కదుపుతాడు. ఈసారి ‘జనతా గ్యారేజ్‌’లోనూ అలాంటి స్టెప్పులతోనే అదరగొట్టబోతున్నాడట. ఎన్టీఆర్‌ కథానాయకుడిగా నటిస్తున్న చిత్రమిది. మైత్రీ మూవీస్‌ సంస్థ నిర్మిస్తోంది. సమంత, నిత్యమేనన్‌ కథానాయికలు. కొరటాల శివ దర్శకత్వం వహిస్తున్నారు. గురువారం నుంచి ఎన్టీఆర్‌, సమంతపై ఓ గీతాన్ని తెరకెక్కిస్తారు. రామజోగయ్యశాస్త్రి రాసిన ఈ గీతానికి శేఖర్‌ మాస్టర్‌ నృత్యరీతులు సమకూరుస్తున్నారు. ఈ పాట కోసం కళా దర్శకుడు ప్రకాష్‌ ఆధ్వర్యంలో నాలుగు సెట్లు వేశారు. ‘‘డ్యాన్సుల విషయంలో ఎన్టీఆర్‌ ఎప్పుడూ ప్రత్యేక శ్రద్ధ తీసుకొంటారు. ప్రతి పాటలోనూ కొత్తదనం చూపిస్తారు. అయితే ఓ పాట మాత్రం మాస్‌ అభిమానుల్ని అలరించే విధంగా ఉంటుంది. ఈ పాట అదే. ఈ సినిమాలో ఈ పాట చాలా ప్రత్యేకం. దానికి తగ్గట్టు ఎన్టీఆర్‌ డ్యాన్సులు కూడా అదిరిపోతాయ’’ని చిత్రబృందం తెలిపింది. సంగీతం: దేవిశ్రీ ప్రసాద్‌

నచ్చితే కొనేస్తా!

కథానాయికగా త్వరలో కాజల్ అగర్వాల్ పదేళ్లు పూర్తి చేసుకోనున్నారు. హీరోయిన్లు ఇన్నేళ్లు కొనసాగడం అంటే మాటలు కాదు. పైగా ఇంకా బిజీగా ఉండటం అంటే చిన్న విషయం కాదు. ఏంటా సీక్రెట్? అనే ప్రశ్న కాజల్ అగర్వాల్ ముందుంచితే - ‘‘సినిమా సినిమాకీ నటిగా ఇంప్రూవ్ అవుతుంటాను. కొత్త కొత్త పాత్రలు సెలక్ట్ చేసుకుంటుంటాను. అన్నింటికన్నా మించి సక్సెస్‌ని నెత్తికెక్కించుకోను. కష్టపడటానికి వెనకాడను’’ అన్నారు. ఒకవైపు సినిమాలు చేయడంతో పాటు మరోవైపు కొన్ని బ్రాండ్స్‌కి ప్రచారకర్తగా కూడా వ్యవహరిస్తున్నారామె.
మరి... డ్రెస్సుల విషయంలో మీరు బ్రాండ్‌కి ప్రాధాన్యం ఇస్తారా? అని కాజల్‌ని అడిగితే - ‘‘బ్రాండ్ గురించి నేను పెద్దగా పట్టించుకోను. ఫైవ్ స్టార్ హోటల్లో తిన్నట్లే.. నేను స్ట్రీట్ ఫుడ్ కూడా తింటుంటాను. బట్టలకు కూడా దీన్ని ఆపాదించొచ్చు. పెద్ద పెద్ద షాపింగ్ మాల్స్‌తో పాటు చిన్న చిన్న షాఫుల్లో, స్ట్రీట్ సైడ్ కూడా కొంటాను. వాటిని బ్రాండెడ్ డ్రెస్సులతో మ్యాచ్ చేసి, వేసుకుంటా. ఏది కొన్నా నాకు సౌకర్యంగా ఉండేలా చూసుకుంటా’’ అని చెప్పారు.

అప్పుడు ఇష్టం... ఇప్పుడు అయిష్టం!

రియల్ లైఫ్ లవర్స్ జంటగా నటిస్తే, రీల్‌పై వాళ్ల కెమిస్ట్రీ అదిరిపోతుంది. అందుకు ఓ ఉదాహరణ రణబీర్ కపూర్, కత్రినా కైఫ్. ఈ ఇద్దరూ లవ్‌లో ఉన్నప్పుడు చేసిన ‘అజబ్ ప్రేమ్‌కీ గజబ్ కహానీ’లో రొమాంటిక్ సీన్స్‌లో జీవించారు. అప్పుడు ఇలాంటి సీన్స్‌లో ఇష్టంగా నటించిన ఈ జంట ఇప్పుడు మాత్రం అయిష్టంగా ఉన్నారట. విడిపోయాక ఈ ఇద్దరూ జంటగా నటిస్తున్న చిత్రం ‘జగ్గా జాసూస్’. అనురాగ్ బసు దర్శకత్వంలో రూపొందుతున్న ఈ చిత్రం అంగీకరించినప్పుడు రణబీర్, కత్రినా ప్రేమలోనే ఉన్నారు. షూటింగ్ కాస్త అయ్యాక విడిపోయారు.               దాంతో ఇప్పుడు రొమాంటిక్ సీన్స్‌లో నటించడానికి ఇష్టపడటంలేదట. మామూలుగా రిస్కీ ఫైట్ సీన్స్‌ని డూప్స్‌తో చేయిస్తారని అందరికీ తెలుసు. కానీ, ఈ చిత్రంలోని రొమాంటిక్ సీన్స్‌ని డూప్‌తో తీస్తున్నారట. రణబీర్, కత్రినా ఈ సన్నివేశాల్లో నటించడానికి ఇష్టపడకపోవడంతో, చేసేదేం లేక ఈ విధంగా నకిలీలతో కానిచ్చేస్తున్నారట.                    ఒకవేళ నకిలీలు కనుక కెమిస్ట్రీ పండిస్తే.. అప్పుడు ప్రాబ్లమ్ లేదు. ఆ సంగతలా ఉంచితే.. దీపికా పదుకొనే నుంచి విడిపోయాక ఆమెతో కలిసి రణబీర్ నటించారు. మరి.. ఇప్పుడు కత్రినా విషయంలో ఈ చాక్లెట్ బోయ్ ఎందుకు అంత పట్టుబడుతున్నారో? అలాగే.. సినిమా కోసం కూడా రణబీర్‌తో రొమాన్స్ నటించడానికి కత్రినా ఎందుకు అంత ఇదవుతున్నారో?.. బలమైన కారణం ఏదో ఉండే ఉంటుంది.

'ఐపీఎల్ లో మళ్లీ చాన్స్ ఇవ్వండి'

 పాకిస్తాన్ ఆటగాళ్లకు ఇండియన్ ప్రీమియర్ లీగ్ (ఐపీఎల్)లో చోటు కల్పించాలని ఐసీసీ అధ్యక్షుడు జహీర్ అబ్బాస్ బీసీసీఐకి విజ్ఞప్తిచేశారు. బెంగళూరులోని చిన్నస్వామి స్డేడియంలో ఆదివారం జరగనున్న ఫైనల్ మ్యాచ్ వీక్షించడానికి ఆయన రానున్నారు. బీసీసీఐ నూతన అధ్యక్షుడు అనురాగ్ ఠాకూర్ ఆహ్వానం మేరకు పాక్ మాజీ కెప్టెన్ బెంగళూరుకు విచ్చేయనున్నారు. ఈ నేపథ్యంలో తమ దేశ ఆటగాళ్లను లీగ్ లో ఆడనిస్తే ఐపీఎల్ కు మరింత జోష్ వస్తుందని అభిప్రాయపడ్డాడు.                        2007 తర్వాత పాక్, భారత్ మధ్య 2012-13 సీజన్లో మూడు వన్డేలు, రెండు టీ20 మ్యాచ్ లు జరిగాయి. ఐపీఎల్ మొదటి సీజన్లో(2008లో) పాక్ క్రికెటర్లు భాగస్వాయులయ్యారని, అయితే ముంబై దాడుల తర్వాత తమ ఆటగాళ్లను లీగ్ నుంచి నిషేధించిన విషయాన్ని ఆయన గుర్తుచేశారు. భారత్ ఆహ్వానం మేరకు ఐపీఎల్ ఫైనల్ వీక్షించేందుకు వస్తున్నాను, ఇరు దేశాల మధ్య క్రికెట్ సంబంధాలు మెరుగు పడేందుకు బీజం పడేలా చేస్తానని ఆశాభావం వ్యక్తంచేశారు. ప్రపంచమంతా భారత్-పాక్ మ్యాచుల కోసం ఎంతో ఉత్సాహంగా ఎదురుచూస్తుందని జహీర్ అబ్బాస్ పేర్కొన్నారు.

పోలీస్‌ స్టేషన్‌లో రామ్‌చరణ్‌

 పోలీసు కథలంటే మన కథానాయకులకు చాలా మక్కువ. అసలు సిసలైన హీరోయిజం చూపించే అవకాశం ఈ కథల్లోనే ఎక్కువ దొరుకుతుంది. మాస్‌కి త్వరగా దగ్గరైపోవొచ్చు. దానికి తోడు స్టైలిష్‌గానూ కనిపించొచ్చు. అందుకే రామ్‌చరణ్‌ మరోసారి ఖాకీ కట్టేశారు. పోలీసు స్టేషన్‌లో హంగామా మొదలెట్టారు. రామ్‌చరణ్‌ కథానాయకుడిగా గీతా ఆర్ట్స్‌ ఓ చిత్రాన్ని తెరకెక్కిస్తోంది. సురేందర్‌రెడ్డి దర్శకుడు. రకుల్‌ప్రీత్‌సింగ్‌ కథానాయిక. అరవింద్‌ స్వామి ప్రతినాయకుడిగా కనిపించనున్నారు. నవదీప్‌ కీలక పాత్రధారి. ప్రస్తుతం హైదరాబాద్‌లో చిత్రీకరణ జరుగుతోంది. పోలీస్‌ స్టేషన్‌ సెట్‌లో రామ్‌చరణ్‌ పోలీస్‌ గెటప్‌ వేసి హంగామా చేస్తున్నాడు. ప్రస్తుతం పోలీస్‌ స్టేషన్‌ నేపథ్యంలో సాగే సన్నివేశాల్ని తెరకెక్కిస్తున్నారు. తమిళంలో ఘన విజయం సాధించిన ‘తని ఒరువన్‌’కి రీమేక్‌ ఇది. ‘ధ్రువ’ అనే పేరు పరిశీలిస్తున్నారు. దసరా బరిలో ఈ సినిమాను దింపాలన్నది చిత్రబృందం ఆలోచన.

మేం కలిసి పనిచేయకపోవడమే మంచిది

 ‘పా’.. ‘డర్టీ పిక్చర్‌’.. ‘కహానీ’ వంటి చిత్రాలతో జాతీయస్థాయిలో ఉత్తమ నటిగా నిరూపించుకుంది విద్యాబాలన్‌. ప్రముఖ నిర్మాత సిద్ధార్థ్‌రాయ్‌ కపూర్‌తో వివాహమైన తర్వాత కూడా వరుస సినిమాలతో కెరీర్‌ని గాడిన పెడుతోంది. ఇటీవల ‘తీన్‌’ చిత్రం ప్రచార కార్యక్రమంలో పాల్గొన్న విద్యా.. తన మరిది కునాల్‌రాయ్‌ కపూర్‌ దర్శకత్వంలో చిన్న పాత్రైనా చేయాలని ఉంది అని చెప్పింది. కానీ.. తన భర్త నిర్మాణంలో మాత్రం నటించనంటోంది. వృత్తిని.. వ్యక్తిగత జీవితాన్ని కలపకుండా ఉంచడానికే మేం ప్రయత్నిస్తాం. అదే తమ వైవాహిక జీవితానికి చాలా మంచిదని చెబుతోంది విద్యాబాలన్‌.
‘‘మేం జంటగా కలిసి పనిచేస్తే చాలా బాగుంటుందని తెలుసు. కానీ వృత్తిని.. వ్యక్తిగత జీవితాన్ని ఎప్పుడూ కలపకూడదని నా అభిప్రాయం. ఆ విధంగా ఉండటానికి మేం ప్రయత్నిస్తాం. అదే మా వైవాహిక జీవితానికి మంచిది. ఎందుకంటే కొన్నిసార్లు మంచి సినిమాలు కూడా ఆడకపోవచ్చు. పైగా ఇప్పటివరకు వృత్తిపరంగా మేమిద్దరం చర్చించుకున్న సందర్భాలు చాలా తక్కువ. అందుకే కలిసి పనిచేయకపోవటమే మాకు మంచిది’’ అని చెప్పింది విద్యాబాలన్‌.

ఆమె కళ్లు చెమర్చాయి!

పాపం, పుణ్యం, ప్రపంచం... ఇవన్నీ తెలియక స్వచ్ఛమైన మనసుతో ఆనందంగా నవ్వుతూ, తుళ్లుతూ ఆడిపాడే ఆ పిల్లలను చూసి కాజల్ కళ్లు చెమర్చాయి. ఎందుకంటే ఈ అందమైన లోకాన్ని చూడలేని చిన్నారులు వాళ్లు. అందుకే ఓ మంచి నిర్ణయమే తీసుకున్నారు కాజల్. అసలు విషయంలోకి వెళితే...  హిందీ చిత్రం ‘దో లఫ్జోంకీ కహానీ’లో కాజల్ అగర్వాల్  అంధురాలిగా నటించిన విషయం తెలిసిందే.
               ఇప్పటివరకూ చాలా సినిమాల్లో అందాలతో కనువిందు చేసిన కాజల్ తొలిసారిగా ఓ అంధురాలి పాత్ర చేశారు. ఈ పాత్ర కోసం ఆమె చాలా హోం వర్క్ చేశారు. తన ఇంటి దగ్గర్లోని ఓ అంధుల పాఠశాలకు వెళ్లి వాళ్ల జీవన విధానం ఎలా ఉంటుంది..? ఎలా ప్రవరిస్తారు? అన్న విషయాలను గమనించారట. ఆ తర్వాత షూటింగ్‌కు వెళ్లారు... డెరైక్టర్ యాక్షన్ అని చెప్పగానే కాజల్ కంగారు పడిపోయారట. మరి.. మామూలుగా నటించకూడదు... కళ్లు లేని వాళ్లలా కనిపించాలి కదా.
             అందుకే టేక్‌ల మీద టేక్‌లు తీసుకున్నారు. దాంతో చిన్న పనులు చేయాలన్నా కళ్లు కనిపించని వాళ్లకెంత కష్టమో కాజల్‌కి అర్థమైంది. అందుకే తన వంతుగా ఏదైనా చేయాలనుకున్నారు. చనిపోయాక  మట్టిలో కలిసిపోయే కళ్లను దానం చేస్తే బాగుంటుందని నిర్ణయించుకున్నారు. ఈ సినిమాలో హీరోగా నటించిన రణదీప్ హుడా కూడా ఇదే నిర్ణయం తీసుకోవడం విశేషం.