నాని సినిమాలో అతిథిగా?

 దర్శకుడు రాజమౌళి తాను తీసే సినిమాల్లో ఏదో పాత్రలో కనిపించి, ప్రేక్షకులకు చిన్న సర్‌ప్రైజ్ ఇస్తుంటారు. గత ఏడాది విడుదలైన ‘బాహుబలి’లో ఐటమ్ సాంగ్‌కి ముందు సీన్లో కాసేపు కనిపించారు. ఇప్పుడు నాని సినిమాలో కనిపించడానికి రెడీ అవుతున్నారన్న వార్త ఫిలింనగర్‌లో హాట్ టాపిక్‌గా మారింది. నాని హీరోగా ‘ఉయ్యాల జంపాల’ ఫేమ్ విరించి వర్మ దర్శకత్వంలో ఓ చిత్రం రూపొందునున్న సంగతి తెలిసిందే. ఈ చిత్రంలో నాని ఓ దర్శకుడికి అసిస్టెంట్ డెరైక్టర్ పాత్రలోకనిపించనున్నారు. ఆ దర్శకుడి పాత్రలో కనిపించమని రాజమౌళిని అడిగితే, గ్రీన్‌సిగ్నల్ ఇచ్చారని సమాచారం.

అతనెవరు?

 నాని హీరోనా... విలనా...? అంటూ ప్రేక్షకులకు పెద్ద పజిల్ ఇచ్చేశారు దర్శకుడు ఇంద్రగంటి మోహనకృష్ణ. అదేంటీ అనుకుంటున్నారా? ఆయన దర్శకత్వంలో నాని హీరోగా రూపొందిన తాజా చిత్రం ‘జెంటిల్‌మన్’ సినిమా టైటిల్‌కి  ‘హీరోనా? విలనా?’ అని ట్యాగ్‌లైన్ పెట్టిన విషయం గుర్తు చేయక్కర్లేదు. మరి.. ఈ జెంటిల్‌మన్ పాత్ర ఎలా ఉంటుందనేది సినిమాలో చూసి తెలుసుకోవాల్సిందే. శ్రీదేవి మూవీస్ పతాకంపై నాని, సురభి, నివేదా థామస్ ముఖ్యతారలుగా  శివలెంక కృష్ణప్రసాద్ నిర్మించిన ఈ చిత్రం ప్రస్తుతం నిర్మాణానంతర కార్యక్రమాలు జరుపుకుంటోంది. ‘‘ఈ నెల 12న టీజర్‌ను, 22న పాటలను విడుదల చే యనున్నాం. అందమైన రొమాంటిక్ థ్రిల్లర్‌గా ఈ చిత్రాన్ని తెరకెక్కించాం’’ అని నిర్మాత చెప్పారు. ఈ చిత్రానికి కథ: డేవిడ్ నాథన్, సంగీతం: మణిశర్మ, కెమెరా: పీజీ విందా.

నన్ను ఇంతవాణ్ని చేసింది అభిమానులే!

‘‘సీతమ్మ వాకిట్లో సిరిమల్లె చెట్టు’ సినిమాకి పనిచేసినప్పుడు మనిషిగా ఎదిగా. ‘బ్రహ్మోత్సవం’తో మరిన్ని విషయాలు నేర్చుకొన్నాన’’న్నారు మహేష్‌బాబు. ఆయన కథానాయకుడిగా నటించిన చిత్రం ‘బ్రహ్మోత్సవం’. సమంత, కాజల్‌, ప్రణీత కథానాయికలు. పీవీపీ సంస్థ నిర్మించింది. శ్రీకాంత్‌ అడ్డాల దర్శకత్వం వహించారు. మిక్కీ జె.మేయర్‌ సంగీతం అందించిన ఈ చిత్రంలోని గీతాలు శనివారం హైదరాబాద్‌లో విడుదలయ్యాయి. తొలిసీడీని మహేష్‌ ఆవిష్కరించి చిత్రబృందానికి అందజేశారు. ప్రచార చిత్రాన్ని సమంత, కాజల్‌, రేవతి, సత్యరాజ్‌ విడుదల చేశారు. మహేష్‌బాబు మాట్లాడుతూ ‘‘ఈ రోజు చాలా ప్రత్యేకం. ఎందుకంటే మా అమ్మాయి సితార ఈ ఆడియో ఫంక్షన్‌కి వచ్చింది. నా సినిమాల పాటల వేడుకకు సితార రావడం ఇదే తొలిసారి. అందరికీ మంచే జరుగుతుంది. ఈ సినిమాతో పెద్ద పెద్ద స్టార్స్‌తో పనిచేసే అవకాశం దక్కింది. వాళ్ల నుంచి చాలా నేర్చుకొన్నా. మరీ ముఖ్యంగా సత్యరాజ్‌గారికి నేను పెద్ద అభిమానిని. ఆయనతో కలసి పనిచేయడం ఓ గౌరవం. తోట తరణి గారి గురించి మాట్లాడే అనుభవం నాకు లేదు.‘అర్జున్‌’లో ఆయన వేసిన సెట్‌ ఎప్పటికీ మర్చిపోను. నేను ఫోన్‌ చేసి అడగ్గానే ఈ సినిమా చేయడానికి ఒప్పుకొన్నారు రత్నవేలు. ‘సీతమ్మ వాకిట్లో సిరిమల్లె చెట్టు’ నా కెరీర్‌లో బెస్ట్‌ ఆల్బమ్‌. దానికంటే ఈ సినిమాలో పాటలు ఇంకా బాగుంటాయి. దర్శకుడు శ్రీకాంత్‌ అడ్డాల అంటే నాకు చాలా ఇష్టం. చాలా స్వచ్ఛంగా ఉంటారాయన. పరిశ్రమ వ్యక్తులతో పెద్దగా కలవరు. అందుకే అంత స్వచ్ఛంగా ఉంటారేమో? ఆయనతో ఇంకా చాలా సినిమాలు చేయాలి. పీవీపీ లాంటి అభిరుచి ఉన్న నిర్మాతల అవసరం చాలా ఉంది. అభిమానుల గురించి నేనెప్పుడూ పెద్ద మాటలు మాట్లాడను. నిజంగా ప్రేమ ఉంటే మాటలతో దాన్ని వ్యక్తపరచలేం. నన్ను ఇంత వాణ్ని చేసింది అభిమానులే. ఈ నెల 20న ‘బ్రహ్మోత్సవం’ విడుదలవుతుంది. థియేటర్లలో పండగ చేసుకొందామ’’న్నారు.
‘‘మంచి అభిరుచి ఉన్న నిర్మాణ సంస్థ పీవీపీ. తెలుగు, తమిళ భాషల్లో ఉత్తమ చిత్రాల్ని నిర్మిస్తున్నారు. శ్రీకాంత్‌ అడ్డాల తీసిన ‘సీతమ్మ వాకిట్లో సిరిమల్లె చెట్టు’ చూశా. సహజంగా ఉంటుందా కథ. పాత్రలు నటిస్తున్నట్టు ఎక్కడా కనిపించదు. ప్రవర్తిస్తున్నట్టు అనిపిస్తుంది. ‘బ్రహ్మోత్సవం’ ప్రచార చిత్రం బాగుంది. గత చిత్రాల కంటే మహేష్‌ అందంగా కనిపిస్తున్నాడు. మీక్కీ జె. మేయర్‌ అందించిన సంగీతం నచ్చింది. ‘శ్రీమంతుడు’ మహేష్‌ చిత్రాల్లో రికార్డు వసూళ్లు సాధించింది. ‘బ్రహ్మోత్సవం’ అంతకంటే గొప్పగా ఆడాలి. నిర్మాతలకు మంచి డబ్బులు తీసుకురావాలి’’ అని ఆకాంక్షించారు కృష్ణ. కాజల్‌ మాట్లాడుతూ ‘‘నా ఆలోచనలకు దగ్గరగా ఉండే కథ ఇది. అందుకే ఇష్టంగా చేశా. నటీనటులకు సినిమా ఓ మతం. ఆ మతానికి ‘బ్రహ్మోత్సవం’ ఓ ప్రార్థనా గీతం’’ అంది. ‘‘ఏ సినిమా చేసినా అందులో నేను ఎలా నటించాను? అనే టెన్షన్‌ ఉంటుంది. అదే మహేష్‌ సినిమా అయితే ‘మహేష్‌ పక్కన నేను ఎలా కనిపిస్తా’ అనే టెన్షన్‌ మొదలవుతుంది. తల్లిదండ్రులు తమ పిల్లల్ని వెతుక్కొంటూ వెళ్లడం మామూలే. కానీ ఈ సినిమాలో పిల్లలు తమ మూలాల్ని వెతుక్కొంటూ చేసే ప్రయత్నం కొత్తగా అనిపించింది. శ్రీకాంత్‌ అడ్డాల మాత్రమే ఇలాంటి సినిమా చేయగలర’’ని సమంత చెప్పింది.
దర్శకుడు మాట్లాడుతూ : ‘‘ఇంతమంది సీనియర్‌ నటీనటుల మధ్య, సాంకేతిక నిపుణుల మధ్య పనిచేయాలంటే కాస్త బెరుకుగా ఉండేది. మహేష్‌బాబు చిరునవ్వు చూస్తే అది మాయమైపోయేది. ఆయనే నన్ను ముందుకు నడిపించారు. ఆయన నాకిచ్చిన రెండో అవకాశం ఇది. దాన్ని నిలుపుకోవడానికి శక్తివంచన లేకుండా కృషి చేశా’’ అన్నారు. మిక్కీ జె.మేయర్‌ చెబుతూ ‘‘నెలల తరబడి ఈ పాటల కోసం కష్టపడ్డాం. పాటలు రాసిన వాళ్లకూ, పాడిన వాళ్లకూ కృతజ్ఞతలు. మహేష్‌బాబు సినిమాకి సంగీతం అందించడం ఇది రెండోసారి. ఆయనతో పనిచేయడం ఓ గౌరవం. ఈ సినిమాలో చాలామంది గొప్ప నటీనటులున్నారు. రేవతి గారికి నేను పెద్ద అభిమానిని. ఈ పాటలు అందరికీ నచ్చుతాయన్న నమ్మకం ఉంద’’న్నారు. నమ్రత, విజయనిర్మల, నరేష్‌, రావు రమేష్‌, సుధీర్‌బాబు, పరుచూరి వెంకటేశ్వరరావు, గోపాలకృష్ణ, ప్రణీత, జయసుధ, రేవతి, సత్యరాజ్‌, వంశీ పైడిపల్లి, రత్నవేలు, తోట తరణి, కె.ఎస్‌.రామారావు తదితరులు పాల్గొన్నారు.

పెళ్లికి గ్రీన్‌సిగ్నల్!

 బాలీవుడ్‌లో అత్యంత యోగ్యుడైన బ్రహ్మచారిగా ముద్రపడిన సల్మాన్‌ఖాన్ త్వరలో ఓ ఇంటివాడు కాబోతున్నట్లు సమాచారం. గతంలో ఎన్నో ప్రేమ వ్యవహారాల్ని నడిపిన ఆయన ప్రస్తుతం రొమానియాకు చెందిన లూలియా వాంటూర్ అనే సుందరితో డేటింగ్ చేస్తున్నాడు. ఈ సంవత్సరాంతంలో సల్మాన్ ఆమెను పెళ్లాడబోతున్నాడని ముంబై సినీ వర్గాల్లో వినిపిస్తోంది. సల్మాన్‌ఖాన్ తల్లి సల్మాఖాన్ ఆరోగ్యం కుదురుగా వుండటం లేదని, తల్లి కోరిక మేరకు సల్మాన్‌ఖాన్ వివాహం చేసుకోవడానికి అంగీకరించాడని చెబుతున్నారు. డిసెంబర్‌లో పెళ్లికి ముహూర్తాన్ని ఖరారు చేసే పనిలో సల్మాన్‌ఖాన్ కుటుంబ సభ్యులు వున్నారని తెలిసింది.

ఆ కల ఇప్పటికి నెరవేరింది

 కథాబలం ఉన్న చిత్రాల్లో నటిస్తూ, హీరోగా  మంచి గుర్తింపు తెచ్చుకున్నారు సందీప్ కిషన్. ప్రస్తుతం రాజసింహ దర్శకత్వంలో ‘ఒక్క అమ్మాయి తప్ప’ చిత్రంలో నటించారాయన. నేడు సందీప్ కిషన్ పుట్టినరోజు. ఈ సందర్భంగా ఆయన చెప్పిన విశేషాలు.
* హైటెక్‌సిటీ ఫ్లై ఓవర్ ట్రాఫిక్‌లో జరిగే ప్రేమకథ ఇది. ఇద్దరు ప్రేమికులు ఆ ట్రాఫిక్‌ను దాటుకుని సమస్య నుంచి ఎలా బయటపడ్డారన్నదే కథ. రియలిస్టిక్ ఎమోషన్స్ బేస్ చేసుకుని కమర్షియల్ ఎలిమెంట్స్‌తో ఈ చిత్రం తెరకెక్కించాం. స్క్రీన్‌ప్లే సినిమాను పరిగెత్తిస్తుంది.
* కళాశాల అంటే ఇష్టం లేక మధ్యలోనే చదువు ఆపేసే పాత్రలో నటించా. ఎదుటివారి మనసు చదివేంత తెలివితేటలున్న అబ్బాయి పాత్ర ఇది. కమర్షియల్ డెరైక్టర్స్‌లో రాజసింహ బెస్ట్ డెరైక్టర్. నేను ఎంచుకున్న మంచి కథల్లో ‘వెంకటాద్రి ఎక్స్‌ప్రెస్’, ‘ఒక్క అమ్మాయి తప్ప’ కూడా ఉంటాయి.  నిత్యామీనన్ ఈ చిత్రం ఒప్పుకోవడానికి కారణం కథే. నాకు, నిత్యామీనన్‌కు హైట్ విషయంలో ఎటువంటి ఇబ్బంది లేదు. సెట్‌లో ఒకరిపై ఒకరు సరదాగా జోకులు వేసుకునేవాళ్లం. మంచి కథ అయితే నెగటివ్ పాత్రల్లో నటిస్తా. హిట్టు, ఫ్లాప్ గురించి పట్టించుకోకుండా ముందుకెళుతుంటా.   
* నేను ఇండస్ట్రీకొచ్చిన కొత్తలో కృష్ణవంశీగారితో పనిచేయాలనుకునేవాణ్ణి. ‘నక్షత్రం’ చిత్రంతో ఆ కల నెరవేరింది. నేను, లావణ్యా త్రిపాఠి కలిసి తమిళంలో ‘మాయవన్’ అనే చిత్రం చేస్తున్నాం. అలాగే మరో తమిళ సినిమాలో నటిస్తున్నాను.

రివ్యూ.. సుప్రీమ్‌

 ‘పిల్లా నువ్వులేని జీవితం’.. ‘సుబ్రమణ్యం ఫర్‌ సేల్‌’ చిత్రాలతో తనని తాను నిరూపించుకొన్నాడు సాయిధరమ్‌ తేజ్‌. డ్యాన్సుల్లో.. ఫైటింగ్‌లలో తనదైన ముద్ర వేశాడు. మేనమామలైన చిరంజీవి.. పవన్‌కల్యాణ్‌లను అనుకరించడం సరేసరి. దాంతో సాయి సినిమా అంటే ఆసక్తి మొదలైంది. ఆ జోరుకి ‘పటాస్‌’తో ఆకట్టుకొన్న అనిల్‌ రావిపూడి తోడయ్యాడు. దీంతో ‘సుప్రీమ్‌’పై అంచనాలు పెరిగేలా చేశాయి. మరి ఆ అంచనాల్ని ఈ చిత్రం ఎంత వరకూ అందుకుందో చూస్తే..
 కథేంటి?: బాలు (సాయిధరమ్‌తేజ్‌) ఓ టాక్సీ డ్రైవర్‌. అతగాడి టాక్సీ పేరు సుప్రీమ్‌. నాన్నంటే (రాజేంద్రప్రసాద్‌) ప్రాణం. కానీ ఆయనేమో తాగుడుకి బానిస. బెల్లం శ్రీదేవి (రాశీఖన్నా) ఓ ఎస్సై. ఆమె బిల్డప్పులకు బాలు ఇట్టే పడిపోతాడు. ప్రేమించమంటూ వెంటపడతాడు. ఈలోగా బాలుకి రాజన్‌ అనే ఓ చిన్న కుర్రాడు పరిచయమవుతాడు. అతనో అనాధ. రాజన్‌ మాటలు.. చేష్టలు బాలుకి తెగ నచ్చేస్తాయి. దాంతో ఇంటికి తీసుకెళ్తాడు.
కాలక్రమంలో రాజన్‌ ఆ ఇంట్లో భాగమైపోతాడు. అయితే.. రాజన్‌ని వెదుక్కొంటూ ఓ ముఠా తిరుగుతుంటుంది. రాజన్‌పై పదిహేను వందల మంది ప్రాణాలు పెట్టుకొని బతుకుతుంటారు. వాళ్లంతా ఎవరు? రాజన్‌ని వారందరూ ఎందుకు వెదుకుతున్నారు? అసలు రాజన్‌కి వచ్చిన సమస్యేంటి? బాలు ఆ సమస్యను పరిష్కరించాడా? లాంటి పశ్నలకు సమాధానం తెలియాలంటే ‘సుప్రీమ్‌’ను వెండితెర మీద చూడాల్సిందే.
ఎలా ఉందంటే?: తొలి సినిమా ‘పటాస్‌’తోనే తన పంథా చాటుకొన్న దర్శకుడు అనిల్‌ రావిపూడి. కథపై పెద్దగా దృష్టి పెట్టకపోయినా సరే.. వినోదంతో కాలక్షేపం చేయించే సత్తా అనిల్‌లో ఉందన్న విషయం తొలి సినిమాతోనే అర్థమైంది. ‘సుప్రీమ్‌’కీ అదే ఫాలో అయిపోయాడు. ప్రేక్షకులకు కావాల్సినవి పంచుకొంటూ వెళ్లాడు. కథలో విషయం లేదని తెలుస్తున్నా.. కామెడీ సన్నివేశాలతో సినిమాని నడిపించేశాడు.
వెన్నెల కిషోర్‌తో పోలీస్‌ స్టేషన్‌లో చేసిన కామెడీ ఆకట్టుకుంటుంది. బెల్లం శ్రీదేవి ఇంట్లో పాయసం చుట్టూ అల్లిన సన్నివేశం.. ఓ పాత్ర ‘కాఫీ.. కాఫీ’ అంటూ ఆ ఒక్క మాటతో ఇంట్లోవాళ్లని సతాయించడం, రఘుబాబు కామెడీ టైమింగ్‌లు పండాయి. దీంతో తొలి అర్థభాగం టైమ్‌ పాస్‌ అయిపోతుంది.
చిక్కంతా సెకండ్‌ హాఫ్‌తోనే. కథేంటో అప్పటికే తెలిసిపోతుంది. అది ఎక్కడ ఆగుతుందో అర్థమైపోతుంది. కాబట్టి.. సన్నివేశాల్ని ఆసక్తిగా రాసుకోవాల్సింది. కానీ అది సరిగా జరగలేదనిపిస్తుంది. తొలి భాగం పండిన వినోదం సెకండాఫ్‌లో మాయమైంది. కేవలం చైల్డ్‌ సెంటిమెంట్‌తోనే నడిపించే ప్రయత్నం జరిగింది. పోరాట ఘట్టాలు.. ఛేజింగులు ఎక్కువయ్యాయి. చివర్లో దివ్యాంగుల పోరాట సన్నివేశం ఒక్కటే.. కొత్తగా అనిపిస్తుంది. క్లైమాక్స్‌ మామూలే.
 

బాలయ్యకు నో చెప్పిందా..?

 ప్రస్తుతం టాలీవుడ్ సీనియర్ హీరోలకు హీరోయిన్ల కష్టాలు ఎక్కువవుతున్నాయి. తమ ఇమేజ్ కు, ఏజ్ కు తగ్గ హీరోయిన్లు తక్కువగా ఉండటంతో హీరోయిన్ల కోసం తిప్పలు తప్పడం లేదు. నయనతార, అనుష్క లాంటి ఒకరిద్దరు మాత్రమే సీనియర్ హీరోలకు సెట్ అవుతారని భావిస్తున్నారు దర్శక నిర్మాతలు. అయితే ఈ హీరోయిన్లు లేడీ ఓరియంటెడ్ సినిమాల మీద కాన్సన్ ట్రేట్ చేస్తుండటంతో స్టార్ హీరోలకు ఎదురుచూపులు తప్పటం లేదు.
తాజాగా నందమూరి బాలకృష్ణ వందో సినిమాగా ప్రతిష్టాత్మకంగా తెరకెక్కుతున్న గౌతమీ పుత్ర శాతకర్ణి సినిమా విషయంలోనూ ఇదే సమస్య ఎదురైంది. ముందుగా ఈ సినిమా కోసం నయనతారను హీరోయిన్ గా తీసుకోవాలని భావించారు. అయితే అదే సమయంలో చిరు 150వ సినిమాతో పాటు తమిళ్ లో కూడా మరికొన్ని సినిమాలు అంగీకరించి ఉండటంతో బాలయ్యకు నో చెప్పింది. ఇక అంజలీ విషయంలోనూ అదే జరిగింది.
తరువాత కాజల్ హీరోయిన్ గా ఫైనల్ చేయాలని భావించినా వర్క్ అవుట్ కాలేదు. చాలా రోజులుగా టాలీవుడ్ లో రీ ఎంట్రీ కోసం ప్రయత్నాలు చేస్తున్న గోవా బ్యూటీ ఇలియానాకు ఛాన్స్ ఇద్దామని భావించినా ఈ అమ్మడు కూడా బాలయ్యకు నో చెప్పేసిందన్న టాక్ వినిపిస్తోంది. సీనియర్ హీరోల సరసన నటిస్తే కెరీర్ త్వరగా ముగిసిపోతుందన్న భయంతోనే ఇలియానా బాలయ్యకు నో చెప్పిందన్న టాక్ వినిపిస్తోంది. అసలే అవకాశాల్లేక కష్టాల్లో ఉన్న సమయంలో బాలయ్య లాంటి స్టార్ హీరో సరసన ఛాన్స్ వస్తే కాదనటం కర్టెక్ట్ కాదంటున్నారు విశ్లేషకులు.

మళ్లీ..అనుష్క వెనుక

 విరాట్‌ కోహ్లి, అనుష్క శర్మ మళ్లీ ఒక్కటవుతున్నారా..? తాజా పరిణామాలు చూస్తుంటే అలాగే అనిపిస్తోంది మరి. అనుష్క నుంచి విడిపోగానే కోహ్లి.. ఆమెను ట్విట్టర్‌, ఇన్‌స్టాగ్రామ్‌ లాంటి మాధ్యమాల్లో అనుసరించడం మానేసిన సంగతి తెలిసిందే. ఐతే ఆదివారం అనుష్క పుట్టిన రోజు సందర్భంగా విరాట్‌ మళ్లీ ఆ రెండు చోట్లా ఆమెను అనుసరించడం మొదలుపెట్టాడు. ఇటీవల అనుష్కను సామాజిక మాధ్యమాల్లో అభిమానులు తిట్టిపోస్తుండటంపై విరాట్‌ మండిపడుతూ ఆమెకు మద్దతుగా నిలవడం.. ఆ తర్వాత ఇద్దరూ కలిసి ఓ విందులో పాల్గొనడం తెలిసిందే. తాజా పరిణామాలు కోహ్లి, అనుష్క మళ్లీ ఒక్కటవుతున్న సంకేతాల్నిస్తున్నాయి.