అక్కడ ఆయనను ముద్దు పెట్టుకోవడం అవసరం!

-మధుశాలిని

‘‘ ‘చీకటి రాజ్యం’లో కమల్‌హాసన్ గారితో ముద్దు సీన్‌లో నటించా. సాధారణంగా ప్రతి సినిమాలో కిస్ అనేది రొమాంటిక్ సీన్‌లో చూపిస్తుంటారు. కానీ ఈ సినిమాలో అక్కడ కమల్ గారిని ముద్దు పెట్టుకోవడం కథకు అవసరం. ఈ సినిమా చూసిన వాళ్లందరికీ ఆ ముద్దు సీన్ కన్విన్సింగ్‌గా అనిసిస్తుంది’’ అని నటి మధుశాలిని చెప్పారు. ఇటీవల విడుదలైన ‘చీకటి రాజ్యం’లో మధుశాలిని కీలకపాత్ర పోషించారు. ఈ సంద ర్భంగా ఆమె మాట్లాడుతూ -‘‘ కమల్ హాసన్ గారంటే ఇష్టం. ఆయన సినిమాకు ఆడిషన్స్ చేస్తున్నారని తెలిసి వెళ్లాను. వెంటనే ఓకే చెప్పారు. ఆయన దగ్గర చాలా నేర్చుకున్నా. నేను త్వరలో తమిళ, మలయా ళాల్లో సినిమాలు చేయ నున్నా. తెలుగులో మంచి పాత్రల కోసం ఎదురు చూస్తున్నా’’ అని తెలిపారు.

పవన్‌కు జోడిగా మరో హీరోయిన్‌ ...

 పవన్‌ కళ్యాణ్‌ నటిస్తున్న ' సర్దార్‌ గర్బర్‌ సింగ్‌'లో మరో హీరోయిన్‌ నటిస్తుంది. ప్రస్తుతం కాజల్‌ హీరోయిన్‌గా నటిస్తున్న విషయం తెల్సిందే. ఈ చిత్రం ఐటెం సాంగ్‌ కోసం ప్రత్యేకంగా లక్ష్మీరారు ఎంపిక చేసినట్లు చిత్ర యూనిట్‌ సభ్యులు ప్రకటించారు. అలాగే ఒక ముఖ్య పాత్ర కోసం హీరోయిన్‌ సంజనను ఎంపిక చేయడం జరిగిందని సమాచారం. సంజన 'బుజ్జిగాడు ' చిత్రంలో సెకండ్‌ హీరోయిన్‌గా నటించింది. ఆ తర్వాత పలు చిత్రాల్లో కూడా నటించినా పెద్ద అవకాశాలు రాకపోవడంతో తమిళం, కన్నడంలో ఈమె నటించింది. అక్కడ కూడా స్టార్‌ హీరోయిన్‌గా అనిపించుకోవడంలో విఫలం అయింది. ఈ సమయంలో అనుకోనుండా పవన్‌ కళ్యాణ్‌ సినిమాలో అవకాశం రావడం బఫర్‌ ఆఫ్పర్‌ వచ్చింది. అమెకు ఈ సినిమా పెద్ద హిట్‌ అవుతుందని నమ్మకం.

నా 'పెళ్లెప్పుడో నాకే తెలియదు' ...

      నా వివాహమెప్పుడో నాకే తెలియదు అంటున్నారు నటి అనుష్క. చారిత్రక కథా చిత్రాలకు చిరునామాగా మారిన నాయకి ఈమె. ఇలా అసమాన పాత్రల్ని అవలీలగా నటించేస్తున్నారు అనుష్క. తాజాగా బొద్దుగా, ముద్దుగా, సన్నగా, నాజూకుగా అవన్నీ ఒకే చిత్రంలో, ఒకే పాత్రలో ఒదిగిపోయింది. సినీ రస హృదయాలను వశపరచుకుని పరవశింపజేయడానికి రానున్నారు. అవును అనుష్క నవరసభరితంగా నటించిన ద్విభాషా చిత్రం ఇంజి ఇడుప్పళగి(తెలుగులో జీరో సైజ్) చిత్రం అందంగా ముస్తాబై శుక్రవారం విడుదల కానుంది. ఈ సందర్భంగా అందాల భామ అనుష్కతో చిన్న భేటీ.

ప్ర: ఎలాంటి కథా చిత్రాల్లో నటించాలని కోరుకుంటున్నారు?
జ: ఫలానా కథా చిత్రాల్లో నటించాలని అనుకోవడం కంటే మంచి కథా చిత్రాల్లో నేనుండాలని ఆశిస్తాను. బాహుబలి, ఇంజి ఇడుప్పళగి లాంటి చిత్రాలు అలా అమరినవే. ఇంజి ఇడుప్పళగి చిత్రం అమ్మాయిలందరికి నచ్చుతుంది. అలాంటి పాత్రను నేనీ చిత్రంలో నటించాను.

ప్ర: సాధారణంగా ఇప్పటి వరకూ నటులే పాత్రల కోసం బరువు తగ్గడం,పెరగడం లాంటివి చేస్తున్నారు. నటిగా మీరు ఇంజి ఇడుప్పళగి చిత్రంలో పాత్రగా మారడానికి బరువు పెరగడం గురించి?
జ: ఈ చిత్రం కోసం తొలుత ఫొటో షూట్ చేసినప్పుడు పాత్రకు గెటప్ సరిగా సెట్ కాలేదు. మేకప్, కాస్ట్యూమ్ డిజైనింగ్‌లో సరిచేద్దాం అన్నారు. మరి కొందరు అధిక మేకప్‌తో ముప్పు కలిగే అవకాశం ఉందన్నారు. బరువు పెంచడంలోనూ ఆపదే అన్నారు. అలాంటివి నాకు సంతృప్తినివ్వలేదు. చిత్ర కథా పాత్రకు తగ్గట్టు బరువు పెరగడమే సరైన చర్య అని నేను భావించాను. అలాంటి నిర్ణయం తీసుకున్న తరువాత మూడు నెలల్లో 17 కిలోల బరువు పెరిగాను.

ప్ర: బరువు పెరగడం కష్టమా? తగ్గడం కష్టమా?
జ: నిజం చెప్పాలంటే రెండూ కష్టమే
 

ప్ర: ఇంజి ఇడుప్పళగి చిత్రంలో సందేశం లాటిదేమయినా ఉంటుందా?
జ: ప్రత్యేకంగా సందేశం అంటూ ఏమీ ఉండదు. అందం అనేది సన్నం లావులను బట్టి ఉండదు. మంచి మనసున్న వారందరూ అందమైన వారేనని చెప్పే చిత్రం ఇంజి ఇడుప్పళగి.

ప్ర: నటి కాకుంటే ఏమైఉండేవారు?
జ: నేను 17వ ఏట నుంచే యోగా చేస్తున్నాను. కాబట్టి నటి కాకుంటే యోగా టీచర్ అయ్యేదాన్ని.

ప్ర: విశాల్, సూర్య, ఆర్య, ప్రభాస్‌లలో మీకు సరైన జోడీ ఎవరనుకుంటున్నారు?
జ: మీరు చెప్పిన వారందరూ నాకు మంచి స్నేహితులే. విక్రమ్, సూర్యలు సీనియర్ నటులు. యూనిట్‌లోని వారినందర్నీ గౌరవించే నటుడు సూర్య. నాకు ఏదైనా సందేహం కలిగినప్పుడు విక్రమ్‌తో చర్చిస్తుంటాను.
 

ప్ర: సినిమాలో అధికంగా నేర్చుకుంది ఎవరి నుంచి?
జ: రజనీకాంత్ నుంచీ చాలా నేర్చుకున్నాను. ఆయన నటన, జీవితం నాకు ఎంతో ఆసక్తిని రేకెత్తించింది. సూపర్‌స్టార్ అయిన ఆయన నిరాడంబరత చాలా నచ్చింది. అలాగే నటి మనోరమ. అరుంధతి చిత్రంలో నటిస్తున్నప్పుడు నటనపై ఆమె అంకితభావం నన్ను విస్మయపరచింది.

ప్ర: తమిళం,తెలుగు భాషల్లో ప్రముఖ కథానాయకిగా రాణిస్తున్నారు. ఏ భాషా అభిమానులంటే మీకు ఇష్టం?
జ: ఏ భాషా కథా చిత్రం అయినా నచ్చితేనే చేస్తాను. నన్ను గెలిపించేది అభిమానులే. వాళ్ల విషయంలో తారతమ్యాలు లేవు.

ప్ర: చిత్ర రంగప్రవేశం చేసి దశాబ్దం దాటింది. ఏదైనా మంచి పాత్ర పోషించాలనే కోరిక ఉందా?
జ: బ్లాక్‌బస్టర్ చిత్రాలలో నటించాలని అందరూ కోరుకుంటారు. అలాంటి మంచి పాత్ర ఏదైనా ఉంటే చెప్పండి. సినిమా అనేది మాయాజాల లోకం. అసలు నేనీ రంగంలోకి వస్తాననే ఊహించలేదు. అంతా దైవేచ్ఛ.

ప్ర: కథానాయికల మధ్య ఇప్పుడు పోటీ అధికం అంటున్నారే?
జ: అలాంటి పోటీ అవసరమే. అప్పుడే ది బెస్ట్ ఔట్‌పుట్‌ను ఇవ్వగలం. అయితే నెంబర్‌ఒన్ పోటీపై నాకు నమ్మకం లేదు. దాని వల్ల అదనంగా లాభం ఉంటుందని కూడా అనుకోను. మంచి కథాపాత్రల్లో నటిస్తే చాలు. నాకు వరుసగా మంచి చిత్రాలు అమరడం సంతోషంగా ఉంది.
 

ప్ర: మీరు నటించిన చిత్రాల్లో ఉత్తమ చిత్రాలుగా మారు చెప్పేది?
జ: మొదటి వరుసలో నాగార్జునతో నటించిన సూపర్ చిత్రం. ఆ తరువాత వేదం, దైవతిరుమగళ్, అరుంధతి, రుద్రమదేవి, బాహుబలి ఇలా చెప్పుకుంటూపోవచ్చు.

ప్ర: అందరూ అడిగే అరిగిన ప్రశ్నే. పెళ్లెప్పుడు చేసుకుంటారు?
జ: ఏడాది పొడుగునా నటులతోనో, వ్యాపారవేత్తలతోనో నన్ను కలుపుతు గ్యాసిప్ ప్రచారం చేస్తూనే ఉన్నారు. ఇక నేను ప్రేమ వివాహమా? తల్లిదండ్రులు నిర్ణయించిన పెళ్లి చేసుకుంటానా? ... అసలు అది ఎప్పుడు అన్నది కూడా నాకు తెలియదు. అయితే పెళ్లి ఎప్పుడు జరిగినా రహస్యంగా మాత్రం జరగదు.

బ్రహ్మానందానికి ఆఫర్లు తగ్గాయా?

       అహ నా పెళ్లంట సినిమాతో 'అరగుండు' బ్రహ్మానందంగా తెలుగు ప్రేక్షకులకు గిలిగింతలు పెట్టిన హాస్యనటుడు బ్రహ్మానందానికి ఆఫర్లు ఏమైనా తగ్గాయా? ఇటీవల స్టార్ హీరోలతో పాటు దర్శక నిర్మాతలు కూడా ఈ స్టార్ కమెడియన్‌ను పక్కన పెడుతున్నారా? రెమ్యునరేషన్ భారీగా ఉండటంతో పాటు... స్క్రిప్టులో వేలు పెట్టడం లాంటివి చేస్తున్నారనే ఇలా ఆయనను దూరం పెడుతున్నట్లు సినీ జనాలు చెబుతున్నారు. కొందరు కొత్త దర్శకులైతే బ్రహ్మానందంతో పనిచేయాలంటే చాలా కష్టమని వాపోతున్నారట. దీంతో కొత్తతరం కమెడియన్లయితే బెటరని దర్శక నిర్మాతలు భావిస్తున్నారట. మరోవైపు తెలుగులో హర్రర్ కామెడీ సినిమాలకు బాగా ప్రాధాన్యం పెరిగిందని, అందుకే ఆ తరహా నటులకే మంచి ఆదరణ లభిస్తోందని సినీ పండితుల వాదన.          కాగా ఇప్పటివరకు దాదాపు వెయ్యికి పైగా సినిమాల్లో తనదైన నటనతో తెలుగు సినీ చరిత్రలో కామెడీ డాన్‌గా అలరించిన నటుడు బ్రహ్మానందం. అరగుండుగా, ఖాన్ దాదాగా, కత్తి రాందాసుగా, శంకర్‌దాదా ఆర్ఎంపీ, జిలేబీ, గచ్చిబౌలి దివాకర్, విద్యాబాలన్, జిల్‌బిల్ పాండే, బద్దం భాస్కర్, హంసరాజ్.... ఇలా వైవిధ్యమైన పాత్రల్లో అద్భుతమైన కామెడీని పండించిన నటుడాయన. అత్యధిక చిత్రాల్లో నటించిన కమెడియన్‌గా గిన్నిస్ బుక్ రికార్డు కూడా సొంతం చేసుకున్నారు.

అనుకోని కలయిక!

 అది గుజరాత్‌లోని ఓ హోటల్. ఆ హోటల్‌లో ఇద్దరు స్టార్స్ బస చేశారు. ఒకరు క్రికెట్ స్టార్ కపిల్ దేవ్. మరొకరు సినిమా స్టార్ పవన్ కల్యాణ్. ఈ ఇద్దరూ అనుకోకుండా ఆ హోటల్‌లో కలిశారు. ఆత్మీయంగా కరచాలనం చేసుకున్నారు. ‘‘మీ సినిమాలు నేను చూశాను. చాలా ఎంజాయ్ చేస్తుంటాను’’ అని పవన్‌తో భారత మాజీ కెప్టెన్ కపిల్ అన్నారు. ఆ మాటలకు పవన్ కల్యాణ్ తనదైన శైలిలో నవ్వారు. 
ఈ హీరోగారు గుజరాత్‌లో ఎందుకు ఉన్నారో ప్రత్యేకంగా చెప్పక్కర్లేదు. బాబీ దర్శకత్వంలో ఆయన హీరోగా శరత్ మరార్ నిర్మిస్తున్న ‘సర్దార్ గబ్బర్‌సింగ్’ షూటింగ్ అక్కడ జరుగుతోంది. పవన్ కల్యాణ్ క్రియేటివ్ వర్క్స్, నార్త్ స్టార్ ఎంటర్‌టైన్ మెంట్స్, ఈరోస్ ఇంటర్నేషనల్ సంయు క్తంగా ఈ చిత్రాన్ని నిర్మిస్తున్నాయి.

టీమ్‌ ఇండియాలో చోటుపై ఆశ ఇంకా ఉంది ...

 జట్టులో చోటు కోల్పోయిన ఆల్‌ రౌండర్‌ ఇర్ఫాన్‌ పఠాన్‌ టీమ్‌ ఇండియాకు ఆడాలనే కోరిక ఇంకా అలాగే ఉందని తెలిపాడు. ఫామ్‌ కోల్పోవడంతో పాటు గాయాల బారిన పడి మూడేళ్ల క్రితం జట్టులో స్థానం కోల్పోయిన ఇర్ఫాన్‌ భారత జట్టు తరఫున ఆడాలనే ఆశ, కోరిక ఇంకా అలాగే ఉన్నాయని, సెలెక్టర్ల నుంచి పిలుపొస్తుందని ఎదురుచూస్తున్నట్లు తెలి పాడు. ఇటీవల రంజీ మ్యాచుల్లో 12 వికెట్లు పడగొట్టడంతో పాటు బ్యాటిం గ్‌లో 90 పరుగులు చేసి రాణించమే దీనికి శుభసూచకమన్నాడీ ఈ బరోడా ఆల్‌రైండర్‌. ఇర్ఫాన్‌ ప్రస్తుతం తాను పూర్తి ఫిట్‌నెస్‌తో ఉన్నట్లు చెప్పాడు. 'ఫస్ట్‌క్లాస్‌ క్రికెట్‌ ఆడే ప్రతి క్రికెటర్‌కు భారత్‌ తరఫున ఆడాలని ఉంటుంది. నాక్కూడా టీమ్‌ ఇండియా తరఫున ఆడాలనే కోరిక ఇంకా అలాగే ఉంది. ప్రసు తం ఆటకు మాత్రమే ప్రాధాన్యమిస్తూ నైపుణ్యం పెంచుకోవడానికి ప్రాధాన్యమి స్తున్నాను. సెలెక్టర్లు గుర్తిస్తారనే నమ్మకముంది' అని ఆశాభావం వ్యక్తం చేశాడు.  2003లో భారత్‌ తరఫున ఆరంగేట్రం చేసిన ఇర్ఫాన్‌ 29 టెస్టుల్లో 100 వికెట్లు పడగొట్టడంతో పాటు 1105 పరుగులు చేశాడు. 120 వన్డేల్లో 173 వికెట్లతో తీసి 1544 పరుగులు సాధించిన ఇర్ఫాన్‌ 2012 ఆగస్టులో చివరి వన్డే ఆడాడు.

సినిమా రివ్యూ: చీకటి రాజ్యం

రేటింగ్‌: 2.75/5


               ఫ్రెంచ్‌ సినిమా 'స్లీప్‌లెస్‌ నైట్‌'కి అధికారిక రీమేక్‌ అయిన 'చీకటి రాజ్యం' సగటు ఇండియన్‌ మసాలా చిత్రాల మూస పోకడలన్నిటికీ భిన్నంగా తెరకెక్కింది. హాలీవుడ్‌ లేదా ప్రపంచ భాషల్లో ఏ సినిమాల్లో చూసినా హీరో గ్లోరిఫికేషన్‌ అనేది యాక్షన్‌ సినిమాల్లో తప్ప మిగతా వాటిలో ఉండదు. కానీ మనకి ప్రతి సినిమాలోను కథానాయకుడినే హైలైట్‌ చేస్తుండాలి. 'చీకటి రాజ్యం' ఎలాంటి 'నేల విడిచి సాము' చేయని ఒక మామూలు థ్రిల్లర్‌. కథాపరంగానే పాత్రలన్నీ కనిపిస్తుంటాయి తప్ప ఒకరు హీరో, ఒకరు హీరోయిన్‌, వీళ్లకో పాట, వీళ్లకిక్కడ కామెడీ అంటూ కొలతలేమీ ఉండవు.
               రొటీన్‌ పోకడలేం లేకపోవడం వల్ల 'చీకటి రాజ్యం' ఫ్రెష్‌ అనుభూతినిస్తుంది. స్టోరీగా చెప్పుకుంటే చాలా సింపుల్‌ పాయింట్‌. కొకైన్‌ బ్యాగ్‌ స్వాధీనం చేసుకున్న అండర్‌ కవర్‌ పోలీస్‌ (కమల్‌) కొడుకుని విలన్‌ (ప్రకాష్‌రాజ్‌) కిడ్నాప్‌ చేస్తాడు. బ్యాగ్‌ ఇస్తే పిల్లాడ్ని ఇస్తా అని డీల్‌ మాట్లాడితే ఆ బ్యాగ్‌ పట్టుకుని వెళ్లిన పోలీస్‌ తమ డిపార్ట్‌మెంట్‌ వాళ్లకే (త్రిష, కిషోర్‌) క్రిమినల్‌గా కనిపిస్తాడు. విలన్‌ ఉన్న పబ్‌లోకి వెళ్లి బ్యాగ్‌ని బాత్రూమ్‌లో దాచి కొడుకు క్షేమం తెలుసుకుని బ్యాగ్‌ ఇచ్చేద్దామని వస్తే అక్కడ అది ఉండదు. తన వెనకపడ్డ పోలీసులు అది తీసేస్తారు. ఆ బ్యాగ్‌ ఇవ్వకపోతే కొడుకుని సేఫ్‌గా తీసుకెళ్లడం కష్టమైన పరిస్థితుల్లో ఆ పోలీస్‌ ఏం చేస్తాడు? రాత్రి గడిచేలోగా కొడుకుని ఎలా కాపాడుకుంటాడు?
                           కథ మొత్తం ఇరవై నాలుగు గంటల్లో నడుస్తుంది. దాదాపుగా ఒక నైట్‌ క్లబ్‌లోనే సినిమా అంతా సాగుతుంది. కొడుకుని కాపాడుకునే ప్రయత్నంలో తండ్రి, క్రిమినల్‌ కాప్‌ని పట్టుకోవాలనే లేడీ పోలీస్‌, కొకైన్‌ బ్యాగ్‌ కోసం చూసే డాన్‌, అతడినుంచి కొకైన్‌ ఆశిస్తున్న మరో క్రిమినల్‌ (సంపత్‌ రాజ్‌), తండ్రి కోసం ఎదురు చూస్తూ ఒక కిడ్నాపర్‌తో కాలక్షేపం చేసే కొడుకు, బాయ్‌ఫ్రెండ్‌తో పబ్‌కొచ్చి అతని నిజ స్వరూపం తెలిసి కాపాడిన పోలీస్‌ వెంట తిరిగే నర్స్‌ (మధు షాలిని)... ఇలా వివిధ క్యారెక్టర్స్‌ అన్నీ ఆ నైట్‌ క్లబ్‌లో చేరితే తెల్లారేలోగా కథ కంచికెలా చేరుతుందనేదే 'చీకటి రాజ్యం'. కిడ్నాప్‌, కొకైన్‌, క్లబ్‌, పోలీస్‌.. ఇలా అన్నీ ఒక బిగి సడలని థ్రిల్లర్‌కి కావాల్సిన లక్షణాలే ఉన్నాయి. కానీ 'చీకటి రాజ్యం' మాత్రం ఆద్యంతం చప్పగా సాగిపోతుంది. 

ప్రథమార్థం వరకు ఎలాంటి థ్రిల్స్‌ లేకుండా మామూలుగా వెళ్లిపోయినా ద్వితీయార్ధంలో అయినా కథనంలో ట్విస్టులు, ఎడ్జ్‌ ఆఫ్‌ ది సీట్‌ ఎంటర్‌టైన్‌మెంట్‌లాంటివి కోరుకుంటాం. కానీ 'చీకటి రాజ్యం' ద్వితీయార్ధం కూడా ఏ విధమైన ఎక్సయిట్‌మెంట్‌ లేకుండా అలా ఫ్లాట్‌గా వెళ్లిపోతుంది. క్రిమినల్‌ చేతిలో కొడుకు కిడ్నాప్‌ అయి ఉన్నాడు, తండ్రి కీలకమైన కొకైన్‌ బ్యాగ్‌ పోగొట్టుకున్నాడంటే ఉత్కంఠ పుట్టించే అవకాశమున్న సరంజామా ఉన్నా కానీ ఎంతసేపు ఒకరికి కనిపించకుండా ఒకరు తప్పించుకు తిరగడమే సరిపోయింది. కొకైన్‌ బ్యాగ్‌ మిస్‌ అయినప్పుడు దానికి బదులుగా మైదా పిండి ప్యాకెట్లు పట్టుకెళ్లి ఇవ్వడం, ఆ బ్యాగ్‌ చుట్టూ నడిపిన పాటి కాస్త డ్రామా అయినా మళ్లీ ఎక్కడా లేకపోయింది. అంతో ఇంతో బాగున్న అంశం ఏదైనా ఉంటే కమల్‌హాసన్‌, త్రిషల ఫైట్‌ సీన్‌. హీరో హీరోయిన్లు సీరియస్‌గా ఫైట్‌ చేసుకోవడం తరచుగా చూసే సన్నివేశం కాదుగా. 
               ఫైట్ల చిత్రీకరణ మాత్రం బాగా చేసారు. నిజంగా ఇద్దరు వ్యక్తులు కొట్టుకుంటే ఎలా ఉంటుందో అలానే అనిపిస్తుంది తప్ప ఎక్కడా సినిమాటిక్‌ ఫీల్‌ ఉండదు. షర్టు నలగకుండా కొట్టేసే హీరో కనిపించడు. ఒకడ్ని కొట్టి చెయ్యి నొప్పెడితే ఆ బాధని భరిస్తున్న సంగతి చూపెడతాడు. సహజత్వానికి దగ్గరగా ఉందనేది ప్లస్‌ పాయింటే కానీ ఆకట్టుకునే కథనం లేకపోవడంతో ఇది వెండితెరపై వీక్షించే సినిమాలా అనిపించలేదు. ఏదో సరదాగా డివిడిలో కాలక్షేపం చేయడానికి పనికొచ్చే బాపతు సినిమా అన్నమాట. తన ప్రతి సినిమాలోను హాస్యం జోడించే ప్రయత్నం చేసే కమల్‌ ఇందులో కూడా అక్కడక్కడా కామెడీని ఇరికించారు కానీ సీరియస్‌ సెటప్‌ మధ్య అదంతగా పేలలేదు. 
                         కమల్‌లోని నటుడ్ని పరీక్షించేంత సీన్‌ ఉన్న క్యారెక్టర్‌ కాదు. ఆయన చాలా ఈజీగా చేసుకుపోయాడు. త్రిష మేకప్‌ లేకుండా పోలీస్‌ పాత్రలో సహజంగా కనిపించింది. పదేళ్లుగా హీరోల వెంట చెట్లు, పుట్టలు తిరుగుతోన్న ఆమెకిది కొత్త ఎక్స్‌పీరియన్సే. మధు షాలిని కేవలం కమల్‌కి ముద్దులు పెట్టడానికి ఉన్నట్టుగా అనిపిస్తుంది. ప్రకాష్‌రాజ్‌కి కూడా చాలా సాధారణ క్యారెక్టర్‌. సంపత్‌ రాజ్‌ ఫర్వాలేదు. సాంకేతికంగా ఈ చిత్రం ఉన్నతంగా ఉంది.
                       లొకేషన్స్‌ ఎక్కువ లేని ఈ సినిమాలో సినిమాటోగ్రాఫర్‌ ప్రతిభ బాగా కనిపిస్తుంది. జిబ్రాన్‌ బ్యాక్‌గ్రౌండ్‌ స్కోర్‌ బ్రహ్మాండంగా ఉంది. దర్శకుడు ఉన్న కథని బాగానే తెరకెక్కించాడు కానీ ఉత్కంఠభరిత సన్నివేశాలని జోడించగలిగి ఉంటే 'చీకటి రాజ్యం' మంచి ప్రయత్నంగానే కాక బాక్సాఫీస్‌ వద్ద విజయాన్ని కూడా దక్కించుకునేది. రొటీన్‌ సినిమాలతో విసిగిపోయిన వారికి కాస్త రిలీఫ్‌ అయితే ఇస్తుంది కానీ ఒక మంచి సినిమా చూసిన అనుభూతిని మాత్రం అందించలేకపోయింది.

సినిమా రివ్యూ: కుమారి 21ఎఫ్‌

రేటింగ్‌: 3/5

 

                    సుకుమార్‌ సినిమాల్లో ఎప్పుడూ రొటీన్‌కి భిన్నమైన ఆలోచనలే కనిపిస్తుంటాయి తప్ప రెగ్యులర్‌ కథలు కానరావు. ఏదైనా కొత్తగా ఉండాలని తపన పడే సుకుమార్‌ తనే నిర్మాతగా మారి ఒక సినిమా తీసాడంటే తప్పకుండా అందులో వైవిధ్యం ఒక పిసరంత ఎక్కువే ఉంటుందని అనుకుంటాం. 'కుమారి 21ఎఫ్‌'లో సుకుమార్‌ నుంచి మనం ఊహించే దానికంటే కాస్త ఎక్కువ సంచలనం, కాస్త ఎక్కువ ఆశ్చర్యం, కాస్త ఎక్కువ వైవిధ్యం ఉన్నాయి. ఇది సగటు తెలుగు సినిమా కాదు. సగటు సోకాల్డ్‌ యూత్‌ఫుల్‌ ఎంటర్‌టైనర్‌ అసలే కాదు. బోల్డ్‌ సినిమా. బోల్డ్‌ అంటే అలాంటిలాంటి బోల్డ్‌ కాదు... పలక తీసుకుని అదే పనిగా ఒకే అక్షరాన్ని దిద్దీ, దిద్దీ బలపం అరిగిపోతే వచ్చేటంత బోల్డ్‌ సినిమా! 
              

     ప్రేమలో పడ్డ టీనేజ్‌ అబ్బాయిలు కొందరు తమ ప్రేయసి తనతోనే ముందుగా ప్రేమలో పడిందా లేక ముందే ఏవైనా అనుభవాలున్నాయా అనే సంఘర్షణకి గురవుతారు. ఆ సంఘర్షణనే సుకుమార్‌ కథావస్తువుగా ఎంచుకున్నాడు. ఒక అమ్మాయి వేషధారణ, సామాజిక పరమైన నడవడికని బట్టి 'క్యారెక్టర్‌'ని తూకమేసే చదువుకున్న బడుద్దాయిలు మనకి అడుగడుగునా కనిపిస్తారు. ఇలాంటి సెన్సిటివ్‌ ఇష్యూని సుకుమార్‌ కథగా మలిచాడు. అబ్బాయిలతో ఫ్రెండ్‌ అంటూ చనువుగా తిరిగేసి, ఎంత రాత్రయినా ఎలాంటి బెరుకు లేకుండా వెళ్లేసి వచ్చేసే కుమారి (హెబా పటేల్‌) ఒక మామూలు కుర్రాడు సిద్ధుని (రాజ్‌) ప్రేమిస్తున్నానంటుంది. అతనికీ ఆమె నచ్చుతుంది. కానీ ఆమె తననే ప్రేమిస్తుందా లేక తాను ప్రేమిస్తున్నానని చెప్పుకు తిరిగే చాలా మందిలో తానూ ఒకడా? తనకున్న సందేహాలు చాలవన్నట్టు ఆమె బిహేవియర్‌ దృష్ట్యా కుమారి 'కన్య' కాదని సర్టిఫై చేసేస్తారు స్నేహితులు. తప్పని పరిస్థితుల్లో ఆమె క్యారెక్టర్‌కి టెస్ట్‌ పెట్టాలని చూస్తాడు. నన్ను ప్రేమించేంత పరిపక్వత నీలో వచ్చినప్పుడు చూద్దామంటూ సిద్ధూని కడిగేస్తుంది. కుమారికి తనకి తెలియని గతం ఒకటుందని తర్వాత తెలుస్తుంది. ఇంతకాలం తనని మోసం చేసిందని సిద్ధు ఊగిపోతాడు. అతను రియలైజ్‌ అయ్యేలోగా ఒక అనర్ధం జరిగిపోతుంది. కానీ కుమారి కోరుకున్న పరిపక్వతని మించి మెచ్యూరిటీ చూపిస్తాడు.

 కొన్ని కథలు ఊహలోకి వస్తేనే 'చూస్తారా లేదా' అనే సందేహం దాటి ముందుకు కదలవు. కానీ సుకుమార్‌ అలాంటి ఒక కథని ఊహించాడు, రాసాడు, తనే నిర్మాతగా మారి తెరకెక్కించాడు కూడా! 'కుమారి' చిత్రానికి రచయితగా సుకుమార్‌ తన మెచ్యూరిటీ లెవల్స్‌ చూపించాడు. ఇందులో హీరో ఒక మాదిరి లోయర్‌ మిడిల్‌ క్లాస్‌ కాలనీలో ఉంటాడు. కనీస అవసరాలు కూడా సరిగా లేని ఆ కాలనీలో పెరిగిన కుర్రాళ్లు చాలా ఈజీగా క్రైమ్‌కి అలవాటు పడతారనేది చెప్పకనే చెప్తాడు. ఏటీమ్‌ల వద్ద దొంగతనాలకి పాల్పడే స్నేహితుల బృందంతో కలిసి తిరిగే హీరో వారి దగ్గర్నుంచి షేర్‌ కూడా తీసుకుంటూ ఉంటాడు. తను చేసేదీ, తిరిగేదీ అంతా తప్పే అయినా కానీ తనని ప్రేమించే అమ్మాయి మాత్రం పర్‌ఫెక్ట్‌గా ఉండాలనుకుంటాడు.

            కుమారి అయితే తనకి ఎంత 'రేటు' పలుకుతుందో హీరోనే అడుగుతుంది. అతనితో కలిసి చాలా క్యాజువల్‌గా మందు కొడుతుంది. అంతే క్యాజువల్‌గా పెదాలపై ముద్దులు కూడా పెట్టేస్తుంది. తనని ప్రేమించడం వల్లే ఇదంతా చేస్తుందని అనుకునేంత మెచ్యూరిటీ హీరోకి లేకపోవడం వల్ల క్యారెక్టర్‌లెస్‌ అనేసుకుని పొరపడతాడు. ఆమె ప్రవర్తన, వేషధారణ అతని అనుమానాలకి ఆజ్యం పోస్తాయి. కానీ సరిగ్గా గమనిస్తే కుమారి ఎక్కడా హీరోతో తప్ప ఎవరితోను చనువుగా మూవ్‌ అవదు. ఎవరి దగ్గర లూజ్‌గా మాట్లాడదు. పక్షవాతంతో కుర్చీలో పడి ఉన్న తాతతో జోక్‌లు వేస్తుందీ, హీరో దగ్గర ఫిల్టర్‌ లేకుండా మాట్లాడేస్తుంది తప్ప మిగిలిన ఎవరి దగ్గరా 'లూజ్‌'గా బిహేవ్‌ చేయదు. ఆర్టిస్ట్‌ ఒక బొమ్మ గీస్తున్నప్పుడు దానిని స్టార్టింగ్‌లో చూస్తే ఏవో పిచ్చిగీతల్లా అనిపిస్తాయి. బొమ్మ పూర్తయితే తప్ప దాని అసలు అందం ఏంటనేది తెలీదు. కుమారి క్యారెక్టర్‌ స్కెచ్‌ని ఒక ఆర్టిస్ట్‌ మాదిరిగా తీర్చిదిద్దాడు సుకుమార్‌. ఆ పాత్ర ఏంటనేది పరిపూర్ణంగా తెలిసాక కానీ ఆమె ఏంటనేది అర్థం కాదు. అయితే హీరోతో పాటు ప్రేక్షకులకి కూడా 'కుమారి'ని 'లవ్‌ చేయాలా వద్దా' అనే అనుమానాన్ని అలాగే ఉంచాలని ఆమెతో గీత దాటించి మాట్లాడించడం, ప్రవర్తించడం చేయించారు. కుమారి ఏంటనేది హీరోతో పాటే చూసేవాళ్లకీ ఒక్కసారే క్లారిటీ వస్తుంది.

            ఇలాంటి కథకి ఎలాంటి క్లయిమాక్స్‌ అయితే పర్‌ఫెక్ట్‌ అనిపిస్తుందో అదే ముగింపునిచ్చాడు సుకుమార్‌. ఈ విషయంలో మెజారిటీ ప్రేక్షకుల ఆమోదం ఉంటుందా లేదా అనేది ఆలోచించకుండా కథౌచిత్యానికే ప్రాధాన్యమిచ్చి తాను మిగిలిన వారి కంటే చాలా భిన్నమని మరోసారి చాటుకున్నాడు. హీరో పేరెంట్స్‌ త్రెడ్‌ ద్వారా హీరోకి రియలైజేషన్‌ వచ్చే సీన్‌ని సృష్టించి 'కుమారి'కి సుకుమార్‌ ఇచ్చిన రైటర్‌ 'టచ్‌' సూపర్బ్‌ అనిపిస్తుంది. అలాగే హీరోయిన్‌ కోరుకునే మెచ్యూరిటీకి మించిన మెచ్యూరిటీని హీరో చూపించడమనే థాట్‌కి సుకుమార్‌ హేట్సాఫ్‌ చెప్పాలి. అందరికీ ఆమోదయోగ్యం కాని దానిని ఆమోదించేలా చేయడంలోనే ఒక రచయిత గొప్పతనం దాగి ఉంటుంది. తెలుగు సినీ పరిశ్రమలో ఉన్న ఉత్తమోత్తమ రచయితల్లో సుకుమార్‌కి సముచిత స్థానం ఇస్తుంది కుమారి. ఈ కథని ఇంకాస్త అండర్‌ ప్లే చేస్తూ ఇంకా ఎక్కువ మందికి రీచ్‌ అయ్యేలా చెప్పి ఉండొచ్చు. 'అడల్ట్‌ సినిమా' ముద్ర పడకుండా కనీసం 'పీజీ (యు/ఏ)' స్థాయి కంటెంట్‌తో అయినా సరిపెట్టి ఉండొచ్చు. అయితే ఫక్తు అడల్ట్‌ సినిమా మాదిరిగానే డీల్‌ చేయడం వల్ల కుమారి మెజారిటీ ఆడియన్స్‌కి రీచ్‌ కాకపోవచ్చు.
                     రాజ్‌ తరుణ్‌ తన పాత్రకి అతికినట్టు సరిపోయాడు. ఆ పాత్రకి కావాల్సిన భావోద్వేగాలని చాలా అలవోకగా పలికించేసి తన ప్రతిభ చాటుకున్నాడు. హెబా పటేల్‌కి అలవాటు పడడానికి కాస్త టైమ్‌ పడుతుంది. ఒక్కసారి అలవాటయ్యాక ఆమె బాగానే అనిపిస్తుంది. నోయల్‌ నటన ఆకట్టుకుంటుంది. హేమ తను చేసే పాత్రలకి భిన్నమైన సాత్విక పాత్రలో కొత్తగా కనిపిస్తుంది. హీరో స్నేహితుల బృందంలో సుదర్శన్‌ తన మార్కు యాస డైలాగులతో నవ్విస్తాడు. దేవిశ్రీప్రసాద్‌ పాటలు బాగున్నాయి. బ్యాక్‌గ్రౌండ్‌ స్కోర్‌, ప్రత్యేకించి ఆ వయొలిన్‌ థీమ్‌ విశేషంగా మెప్పిస్తుంది. రత్నవేలు సినిమాటోగ్రఫీతో ఈ చిత్రం చాలా క్వాలిటీగా అనిపిస్తుంది. దర్శకుడు సూర్య ప్రతాప్‌ కథలోని సోల్‌ని క్యారీ చేయగలిగాడు. ప్రతాప్‌ బాగానే హ్యాండిల్‌ చేసినా కానీ ఇది సుకుమార్‌ తీసి వుంటే ఇంకెలా ఉండేదో అనే ఆలోచన అయితే రాకపోదు.